Diasporamızın I Forumu

      9 mart 2007-ci il tarixində bütün Türk Dünyası üçün mühüm əhəmiyyət kəsb edən Azərbaycan və Türkiyə Diaspora Təşkilatları Rəhbərlərinin I (birinci) Forumu Bakıda Heydər Əliyev adına sarayda keçirildi. Yüksək səviyyədə təşkil olunmuş forumda dünyanın 48 ölkələsində yaşayan Azəri və Türk diaspora təşkilatları rəhbərləri ilə yanaşı Azərbaycan Respublikası prezidenti zati-aliləri cənab İlham Əliyev, Türkiyə Cümhuriyyəti baş naziri zati-aliləri cənab Rəcəb Tayyib Ərdoğan və Şimali Kipr Türk Respublikasının lideri cənab Məhmət Əli Tələt iştirak edirdi. Foruma xeyli sayda xarici qonaqlar, dövlət rəsmiləri, nazirlər, millət vəkilləri, siyasi və ictimai xadimlər də dəvətli idilər. Türkiyə Cümhuriyyətinin banisi Mustafa Kamal Atatürkün "Azərbaycanın sevinci sevincimiz, kədəri kədərimizdir." sitatı və portreti zalın sol küncündə, ulu öndər Heydər Əliyevin "Biz bir millət, iki dövlətik." sitatı və portreti isə zalın sağ küncündə asılmışdı. Bu saray ilk dəfə idi ki, misli görünməmiş belə bir həmrəylik, birlik və qardaşlıq nümunəsinə şahidlik edirdi.
      Azərbaycan-Yaponiya Dostluq Cəmiyyətini bu forumda cəmiyyətin sədri Dr. Rəhman Şahhüseynli təmisil edirdi. Forumun rəsmi hissəsi 2 saata qədər davam etdi. Daha sonra iştirakçılar Park Inn otelinə yollandılar. Burda Azərbaycan vəTürkiyə diaspora təşkilatlarının birgə fəaliyyət mexanizmi müzakirə olundu. Geniş çıxışlar və müzakirələrdən sonra bu diaspora təşkilatlarının birgə fəaliyyət strategiyası, bir neçə tarixi əhəmiyyətli bəyənnamə və sənədlər qəbul olundu.
       İşgüzar toplantıdan sonra Gülüstan Sarayında cənab prezidentin adından ziyafət verildi. Burada səmimi söhbətlər edildi, yeni tanışlıq əlaqələri quruldu və xatırə şəkilləri çəkdirildi. Ziyafət Bakı bulvarında təşkil olunmuş atəşfəşanlıqla başa çatdı.
       Beləcə, Azərbaycan və Türkiyə Diaspora Təşkilatları Rəhbərlərinin I Forumu başa çatdı. II Forumun Türkiyədə keçirilməsi qərarlaşdırıldı. (Forumdan şəkillər aşağıda).