Azərbaycan-Yaponiya mail  qrupuna üzv olmaq üçün buraya daxil olun.

 
Home
Up

             

                    

              

       

ÇGeri      
       (Tədbirdən şəkillər aşağıda)

       Azərbaycan-Yaponiya Dostluq Cəmiyyəti (AYDC) 28 dekabr 2006-cı il tarixində Yaponiyanın Osaka şəhərində Dünya Azərbaycanlılarının Həmrəyliyi Günü və Yeni İl münasibətilə bayram ziyafəti təşkil etdi. Keçiriləcək tədbir haqqında 1 ay əvvəlcədən AYDC-nin internet səhifəsində elanlar dərc olunmuşdu. Tədbirə Yaponiyada yaşayan Azərbaycanlılar, cənubdan olan soydaşlarımız, bu ölkədəki Türkiyə diaspora təşkilatlarının nümayəndələri və eləcə də xeyli sayda yaponlar və müxtəlif millətlətlərin nümayəndələri dəvət olunmuşdular. Azərbaycan Respublikasının Yaponiyadakı səfirliyi də ziyafətə rəsmi dəvətli idi. Ancaq səfirlikdən görüləsi işlərinin çoxluğu səbəbindən tədbirə gələ bilməyəcəkləri bildirilmişdi. Qeyd edək ki, Həmrəylik Günü ilk dəfə idi ki, Yaponiyada belə geniş tərkibdə (cənublu-şimallı Azərbaycanlılar və Türkiyəli soydaşlarımız) və rəngarəng programla qeyd olunurdu.
     Ziyafəti təşkil edən və maliyyələşdirən AYDC sədri, Osaka Universitetində tədqiqatçı alim Rəhman Şahhüseynli idi. Milli xörəklərimizin hazırlanmasında, qonaqların qarşılanmasında, dekorasiya və tərtibat işlərində Yoko xanım (yapon) və digər AYDC üzvləri həmçinin Yaponiyada təhsil alan həmvətənlərimizdən Sveta xanım, Günay xanım, Emil bəy və Vaqif bəy də fəal iştirak edirdilər.
    Tədbir Azərbaycan Respublikasının və Yaponiyanın dövlət himnlərinin səsləndirilməsi ilə başladı. R. Şahhüseynli açılış nitqi söyləyərək ziyafət iştirakçılarını salamladı, AYDC-nin yaranma tarixindən və yaranma zərurətindən, türk soylu xalqların coğrafiyasından, onların arasındakı qırılmaz etnik bağlardan və eləcə də 1828-ci ildə Azərbaycanın 2-yə bölünməsindən və müasir tariximizin ən qaranlıq səhifəsi olan Qarabağ və digər torpaqlarımızın işğalından danişdı. Azərbaycan və Türkiyə diasporalarının birgə fəaliyyətinin səmərəliliyi və effektililiyindən danışan R. Şahhüseynli Türkiyəli soydaşlarımızla çiyin-çiyinə fəalliyyət göstərərək ortaq hədəflərimizə daha asanlıqla yetişə biləcəyimizi bildirdi. Daha sonra söz çıxış edəcək iştirakçılara verildi.
    Yapon iştirakçılar adından çıxış edən Osaka əyaləti Müəllimlərin Həmkarlar Komitəsinin sədri cənab Şuichi Aoki Azərbaycanla yaxından tanışlığının 2004-cü ildə Rəhman Şahhüseynli ilə tanış olması ilə başladığını bildirdi. Azərbaycan və Yaponiya xalqlarının dosluğunun və bir-birilərini daha yaxından tanımasının zəruriliyini vurğulayan cənab Ş. Aoki bundan sonra da AYDC-nin fəalliyətini dəstəkləyəcəyini və bu istiqamətdə əlindən gələn hər şeyi edəcəyini bildirdi.
     Cənubi Azərbaycandan olan həmvətənimiz Bəhnam Cahidzadə isə öz çıxışında Azərbaycanın 2-yə parçalanmasının tarixinə toxunaraq torpaqlarımızın regionun tarixi imperiyaları arasında bölüşdürülməsi faktını və bunun nəticəsində Azərilərin ikiyə bölünüb iki əsrə yaxın qonşu imperiyaların əsarəti altında yaşadığını diqqətə çatdırdı. Sovet imperiyasının çöküşündən sonra Azərbaycanın müstıqillik tarixində yeni bir dövrün başlamasına baxmayaraq hələ də Azərilərin əksəriyyətinin azadlıqlarını tam əldə etmədiklərini və milyonlarla Azərinin hələ də imperiya əsarətində yaşadığını bildirdi.
     Türkiyəli soydaşlarımızın adından çıxış edən Osaka Yaponiya-Türkiyə Cəmiyyətinin həmsədri Fatih Yıldırım isə getdikcə dünyada sayı və nüfuzu artan türk soylu xalqların parlaq gələcəyinə umidlə baxdığını vurğuladı. Dilimizin, mədənəyətimizin və adət-ənənələrimizin hardasa tamamilə eyni olduğunu söyləyən natiq xırda fərqliliklərin ümumi işimizə heç bir mənfi təsir göstərməyəcəyinə əmin olduğunu bildirdi. Natiq bu cüzi fərqliliklərin “KARDEŞ” və “QARDAŞ” sözləri arasındakı səs fərqində olduğu qədər nəzərəçarpmaz olduğuna diqqət çəkərək Azərbaycan və Türkiyə türklərini bundan sonra da həmrəy olmağa çağırdı.
     Tədbirin rəsmi hissəsinin sona çatdığını elan edən R. Şahhüseynli bütün qonaqları bir neçə növ milli xörəklərimizlə və çeşidli içkilərlə bəzədilmiş masalara dəvət etdi. Bayram ziyafəti canlı musiqi ifası ilə, birlikdə mahni oxumaqla, rəqs etməklə və şer söyləməklə davam etdi. Dörd saata yaxın davam edən tədbir Yaponiyada çox oynanılan “Bingo” oyunu ilə yekunlaşdı. Oyunun qaliblərinə Azərbaycandan gətirilmiş hədiyyələr—Azərbaycan şərabı, Xədicə xanımın (R. Şahhüseynlinin nənəsi) əl işi olan Zəngəzur naxış üslubu ilə toxunmuş isti yun corablar və Vətənimizin görməli yerlərinin fotoşəkilləri hədiyyə edildi.
     Qonaqlara təşəkkürünü bildirən R. Şahhüseynli həmvətənlərimizi Həmrəylik Günü münasibətilə, bütün qonaqları isə Yeni İl münasibətilə təbrik etdi. Beləcə, Yaponiyada ilk dəfə olaraq Azərbaycanlılar Həmrəylik Gününü yüksək səviyyədə təşkil olunmuş ziyafətlə təntənəli şəkildə qeyd etmiş oldular.
ÇGeri
Tədbirdən şəkillər:

Bizə yazın-Contact us-お問い合わせ はこちら