DA-nın II Qurultayı

16 mart 2006-cı il Azərbaycan tarixinə əlamətdar bir gün kimi daxil oldu: Dünya Azərbaycanlılarının II Qurultayı Bakıda toplandı. Bu tarixdə dünyanın müxtəlif ölkələrində məskunlaşan soydaşlarımız doğma Vətən Azərbaycana toplaşaraq onun problemləri ilə daha dərindən tanış oldular, geniş müzakirılər apardılar, çox mühüm qərarlar qəbul etdilər və cari iş perspektivlərini müəyyənləşdirdilər. Qurultaya Azərbaycan diasporunun təməl daşları--xarici ölkələrdə yaşayıb Vətən üçün yaradıcı işlər görən Azərbaycanın övladları və eləcə də Azərbacan üçün xeyirli işlər görən bu ölkənin dostları dəvət olunmuşdular. Dünyanın 50-yə yaxın ölkəsindən gələn qurultay iştirakçıları arasında Azərbaycanı Yaponiyada geniş şəkildə təbliğ edən Azərbaycan-Yaponiya Dostluq Cəmiyyəti də vardı: AYDC-dən 3 nəfər qurultaya dəvətli idi: AYDC təsisçisi və sədri Rəhman Şahhüseynli, AYDC-nin fəxri sədri, Yaponiyanın Azərbaycandakı keçmiş səfiri cənab Toşiyuki Fujivara və AYDC üzvü Tomoaki Murakami.
Qurultay günü AYDC sədri R. Şahhüseynli Azərbaycan Respublikasının Prezidenti cənab İlham Əliyevlə görüşdü və Yapoiyadakı Azəri icmasının səmimi salamlarını Zati-Alilərinə çatdırdı. Yaponiyaya səfəri zamanı Azərbaycan icmasının Onunla görüşmək arzusunda olduğunu, bunun üçün icma üzvlərinin əlaqədar qurumlara müraciət etdiklərini amma bu görüşün baş tutmamasından məyus olduqlarını R. Şahhüseynli cənab Prezidentin nəzərinə çatdırdı. R. Şahhüseynli bir sıra Azərbaycan rəsmiləri ilə də AYDC və Yaponiyadakı icmamız haqqında söhbətlər etdi, onların məsləhət və tövsiyyələrini dinlədi. Qurultay ərəfəsində və eləcə də qurultaydan sonra AYDC və görlən işlər barəsində Azərbaycan ictimaiyyətinə geniş məlumat verildi. İctimai Televiziya, ANS, ATV, LİDER telekanallarında çıxışlar edildi, xeyli sayda qəzet və jurnallara müsahibələr verildi. (Şəkillər aşağıda)